ការយល់ច្រឡំរបស់ National Geographic Magazine
អំពីត្រីសូល៌លើកំពូលប្រាសាទអង្គរវត្ត
ទោះបីជាសព្វថ្ងៃ សញ្ញាត្រីសូល៌ដែលស្ថិតនៅលើតួប៉មនីមួយៗ នៃប្រាសាទអង្គរវត្តត្រូវបានបាត់បង់ក្ដី ក៏ប៉ុន្ដែយើងអាចបញ្ជាក់អំពីវត្តមាន និងរូបរាងនៃគ្រឿងតុបតែងលំអទាំងនោះ យ៉ាងជាក់ច្បាស់តាមរយៈការសិក្សាស្រាវជ្រាវ ដែលជាទំនៀមទំលាប់ ប្រពៃណីខ្មែរនាសម័យអង្គរ ។
ថ្មីៗនេះមានសេចក្ដីរាយការណ៍របស់អ្នកស្រាវជ្រាវមួយក្រុម នៃ National Geographic Magazine ខែ៧ ឆ្នាំ២០០៩ តាមរយៈគំនូរមួយយ៉ាងធំ ដែលមានចំណងជើងថា ចក្រភពខ្មែរភាពរុងរឿងសម័យបុរាណនៃកម្ពុជា ។
កំពូលតួប៉មប្រាសាទដែលមានសញ្ញា ត្រីសូល៌, ចម្លាក់បាយ័ន ស.វ.ទី១២ (១៩៩៣)
ប៉ុន្ដែជាអកុសល ក្រុមអ្នកស្រាវជ្រាវបានគូរនិមិត្តសញ្ញាខាងលើនេះ ខុសពីលក្ខណៈដើមជាច្រើនអន្លើដោយហេតុថា ពួកគេមិនបានឈរលើមូលដ្ឋានច្បាស់លាស់ ។ តាមពិតទៅគំនូរត្រីសូល៌នៅលើកំពូលទាំង ៥ អមជុំវិញកំពូលកណ្ដាលនៃប្រាសាទអង្គរវត្ត ដែលពួកគេទទួលស្គាល់ថា សាងសង់ឡើងសម្រាប់ឧទ្ទិសដល់ព្រហ្មញ្ញសាសនានោះ បែរជាមានលក្ខណៈដូចកំពូលចេតិយវត្តទៅវិញ ។ ហើយកំពូលកណ្ដាលនេះទៀតសោត ក៏ត្រូវបានគូរឡើងដោយខុសទំនងដែរ នោះគឺគេឃើញមានសញ្ញាត្រីសូល៌នៅពីលើភ្នំ ។ តើលើមូលដ្ឋានអ្វីបានជាយើងហ៊ានអះអាងថា គំនូរត្រីសូល៌ទាំងនោះមានលក្ខណៈខុសពីលំនាំដើម ?ដូច្នេះដើម្បីបង្ហាញឲ្យច្បាស់ ពីភាពខុសឆ្គង យើងសូមលើកយកភស្តុតាងផ្សេងៗ ជាពិសេសភស្ដុតាងបុរាណវិទ្យាពាក់ព័ន្ធសញ្ញាត្រីសូល៌ខាងលើនេះ ផ្ទាល់តែម្ដងមកបញ្ជាក់ឲ្យបានជាក់ច្បាស់ពីការខុសឆ្គងនេះ ។
គំនូរមានភាពខុសឆ្គង របស់ National Geographic Magazine ខែកក្កដា ឆ្នាំ ២០០៩ កន្លងមកនេះ
តាមការខិតខំស្រាវជ្រាវរបស់យើងកន្លងមក ពីចម្លាក់លើប្រាសាទបាយ័នបាននាំឲ្យយើងឃើញថា សញ្ញាត្រីសូល៌នៅលើកំពូលតួប៉មប្រាសាទនាជំនាន់សម័យអង្គរ មានទម្រង់ខុសពីរូបភាពនៃ National Geographic Magazine ហើយមានលក្ខណៈប្រហាក់ប្រហែលគ្នានឹងត្រីសូល៌ នៃប្រាង្គប្រាសាទថៃ នាសម័យអយុធ្យាទៅវិញ ។ដូច្នេះយើងមិនបាច់បកស្រាយឲ្យវែងឆ្ងាយទេ ព្រោះចំណុចនេះជាចំណុចវិជ្ជមាន ហើយវាងាយយល់ណាស់ក្នុងវិស័យសិល្បៈស្ថាបត្យកម្មបុរាណខ្មែរ ដែលរមែងតែងតែមានក្រឹត្យក្រមជាមូលដ្ឋានគ្រឹះ ។ ព្រោះថាវិចិត្រករខ្មែរមានជំនឿជ្រួតជ្រាបទៅក្នុងក្រអៅបេះដូង មិនអាចរំលងបញ្ញត្តិស្ថាបត្យកម្មដូនតាឡើយ ។
បញ្ហាត្រីសូល៌នៅលើកំពូលប្រាសាទអង្គរវត្ត
សញ្ញាត្រីសូល៍ រកឃើញរកឃើញនៅបរិវេណទីក្រុង អាយុធ្យា (ឯកសារ Thai fine arts ppt)
(ម.ត្រាណេ)
Source : Reaksmey Kampuchea
No comments:
Post a Comment